Senim gramotasyn qabyldaý rásimi barysynda Memleket basshysy Qasym-Jomart Toqaev Amerıka Qurama Shtattarynyń Qazaqstandaǵy Tótenshe jáne О́kiletti elshisi Ýılıam Mozerdi elimizdegi dıplomatııalyq qyzmetiniń resmı túrde bastalýymen quttyqtady. Sondaı-aq, eki jaqty qarym-qatynastardy nyǵaıtý úshin osy oqıǵanyń mańyzdy ekenin aıtty.
– Biz Qazaqstan men Amerıka arasyndaǵy qarym-qatynastardyń qazirgi deńgeıin joǵary baǵalaımyz. Memlekettiń jańa basshysy retinde maǵan bildirgen jyly lebizi úshin AQSh Prezıdenti Donald Trampqa rızashylyǵymdy aıtqym keledi, – dedi Qasym-Jomart Toqaev.
Ýılıam Mozer Memleket basshysyna alǵys bildirip, Qazaqstannyń Tuńǵysh Prezıdenti – Elbasy Nursultan Nazarbaevtyń byltyr Amerıka Qurama Shtattaryna jasaǵan sapary aıasyndaǵy eki jaqty yntymaqtastyqtyń perspektıvalaryn erekshe atap ótti.
Kezdesý sońynda Qasym-Jomart Toqaev Ýılıam Mozerdi Qazaqstandaǵy dıplomatııalyq mıssııasynyń bastalýymen taǵy da quttyqtap, onyń jumysy elderimiz arasyndaǵy dostyq pen ózara senimdi odan ári nyǵaıtýǵa septigin tıgizetinin aıtty.
